اللعبة تطلع لحالها أو تعلق؟ ابدأ من هنا

تلعب وفجأة اللعبة تسكّر وترجعك لسطح المكتب، أو تعلق الصورة وتضطر تسكرها؟ هذي من أكثر الأشياء اللي تنرفز، وأسبابها كثيرة، بس أغلبها بسيط وينحل من غير ما تفتح الجهاز. السر إنك تلاحظ وش يصير بالضبط، وبعدها تمشي على الخطوات من الأسهل للأصعب.

باختصار: حدد نوع الطلعة، وهل هي في لعبة وحدة ولا كل الألعاب. لو لعبة وحدة، افحص ملفاتها ونزّل إعداداتها. لو كل الألعاب، حدّث تعريف الكرت وسكّر البرامج اللي فوق اللعبة وشيك على الحرارة. ولو الجهاز كله يطفي أو يعيد التشغيل، كلمنا على طول.

لاحظ أول

وش يصير بالضبط؟

فيه ثلاث حالات. الأولى إن اللعبة تسكر وترجعك لسطح المكتب، وهذي غالبًا من اللعبة نفسها أو التعريف. الثانية إن الصورة تعلق وما تقدر تسوي شي، وهذي ممكن تعريف أو حرارة أو ضغط على الكرت. والثالثة إن الجهاز كله يطفي أو يعيد التشغيل، وهذي ما تنحل بالإعدادات ولازم نشوفها معك.

لعبة وحدة ولا كل الألعاب؟

هذا أهم سؤال. لو المشكلة في لعبة وحدة بس والباقي تمام، فالسبب غالبًا في ملفات اللعبة أو إعداداتها أو تحديث جديد نزل لها. أما لو كل الألعاب تطلع، فالسبب أعم، مثل تعريف الكرت أو الحرارة أو قطعة.

لو لعبة وحدة

افحص ملفات اللعبة

في ستيم، زر يمين على اللعبة، ثم خصائص، ثم الملفات المثبتة، واضغط فحص سلامة ملفات اللعبة. يفحص كل الملفات وينزّل الناقص أو الخربان. المنصات الثانية مثل Epic وغيرها فيها نفس الخيار باسم Verify أو Repair.

ذاكرة الكرت مليانة؟

بعض الألعاب الحديثة تاخذ ذاكرة كرت أكثر من اللي عندك لو حطيت كل شي على أعلى شي، وهنا تطلع أو تعلق. افتح إدارة المهام، ثم الأداء، ثم كرت الشاشة، وشوف ذاكرة الكرت وانت في اللعبة. لو قريبة من الآخر، نزّل جودة الخامات درجة وحدة، وغالبًا ما تحس بفرق في الشكل.

لو كل الألعاب

حدّث تعريف كرت الشاشة

نزّل آخر تعريف من NVIDIA App أو AMD Adrenalin. ولو المشكلة بدأت بعد تحديث تعريف بالذات، جرب النسخة اللي قبلها. ولو التعريف ما رضى يتثبت صح، شوف مقالة تعريف الكرت ما يرضى يتثبت.

سكّر البرامج اللي فوق اللعبة

برامج مثل الديسكورد أوفرلاي، وتسجيل الشاشة، وبرامج مراقبة الحرارة، وحتى المتصفح المفتوح على مقطع، كلها تشتغل مع اللعبة وأحيانًا تتعارض معها. سكّرها كلها وجرب، ولو اختفت المشكلة رجّعها وحدة وحدة لين تعرف أي واحد السبب.

شيك على الحرارة

لو الطلعة تصير بعد وقت من اللعب، مو من أوله، فالحرارة احتمال قوي. شغّل برنامج HWiNFO المجاني والعب ربع ساعة، وبعدين شوف أعلى حرارة للمعالج والكرت. لو قريبة من الأحمر، لا تفتح الجهاز ولا تفك شي، كلمنا وحنا نشوف التهوية معك.

متى تكلمنا على طول

لو الجهاز كله يطفي أو يعيد التشغيل وقت اللعب، أو طلعت لك شاشة زرقاء، أو الطلعات في كل الألعاب ولا نفعت معك الخطوات، أو الحرارة عالية، أرسل لنا. هذي غالبًا تحتاج فحص، وكل ما بدرنا أسرع.

رقم طلبك، واسم اللعبة أو الألعاب، ووش يصير بالضبط، وصورة لأي رسالة خطأ. وفريقنا يكمل معك.