«الواي فاي ما يطلع عندي» و«التحميل بطيء» من الأسئلة اللي تجينا كثير بعد الاستلام. وأغلب الحالات وحدة من ثلاث: اللوحة ما فيها واي فاي أصلًا، أو الأنتينا مو مركبة، أو التعريف ناقص. نمشي عليها بالترتيب.
باختصار: تأكد إن اسم لوحتك فيه WIFI، وركّب الأنتينا خلف الجهاز، ونزّل تعريف الواي فاي من موقع شركة اللوحة. ولو تبي أفضل سرعة وثبات في الألعاب، السلك دايم أحسن.
تشغيل الواي فاي
جهازك فيه واي فاي أصلًا؟
مو كل اللوحات الأم فيها واي فاي. شوف اسم لوحتك في فاتورتك أو على اللوحة نفسها: إذا آخره WIFI (أو WIFI7 أو AX) فهي فيها واي فاي وبلوتوث، وإذا ما فيه، فاللوحة تشتغل بسلك إنترنت بس.
ركّب الأنتينا
خلف الجهاز، في منطقة منافذ اللوحة، فيه مسمارين ذهبيين صغار. الأنتينا تجي في كرتون الجهاز أو كرتون اللوحة، اربطها عليهم ولفها باليد لين تثبت. بدونها الإشارة تكون ضعيفة جدًا أو ما تطلع شبكات أبد.
التعريف ناقص؟
افتح إدارة الأجهزة (اكتب Device Manager في قائمة ابدأ). إذا شفت جهاز عليه علامة صفراء باسم Network Controller، فتعريف الواي فاي ناقص. ادخل موقع شركة اللوحة، ابحث باسم لوحتك، ونزّل تعريف WLAN أو Wi-Fi وتعريف Bluetooth من قسم الدعم.
لوحتك بدون واي فاي؟
عندك ثلاث حلول: سلك إنترنت من الراوتر للجهاز، وهذا الأفضل للألعاب لأنه أثبت وأسرع. أو قطعة واي فاي USB صغيرة، أسهل حل وتشتغل على طول. أو كرت واي فاي داخلي يركب في اللوحة، إشارته أقوى. ولو تبي واحد منها كلمنا ونرشح لك المناسب لجهازك.
الإنترنت بطيء
المسافة والجدران أهم من الباقة
كل جدار بين الجهاز والراوتر يضعّف الإشارة، فالجهاز ممكن يكون أبطأ من جوالك وانت جنب الراوتر. إذا الراوتر قريب اختر الشبكة اللي اسمها فيه 5G، أسرع بكثير. وإذا بعيد، السلك أو مقوي الشبكة يحل المشكلة.
البلوتوث
توصيل سماعة أو يد تحكم
البلوتوث موجود في نفس قطعة الواي فاي، يعني يحتاج الأنتينا وتعريفه بعد. افتح الإعدادات، ثم البلوتوث والأجهزة، واضغط إضافة جهاز، وخلّ سماعتك أو يدك في وضع الاقتران واخترها من القائمة.
متى تكلمنا على طول
إذا لوحتك فيها WIFI بالاسم، والأنتينا مركبة، والتعريف منزل، ومع ذلك ما تطلع شبكات، كلمنا وأرسل:
صورة لإدارة الأجهزة، رقم طلبك، ووش جربت، ونتابع معك.