الجهاز يشتغل والشاشة ما تطلع صورة؟ سبع خطوات قبل لا تقلق

أكثر رسالة توصلنا بعد ما يستلم الزبون جهازه: «الجهاز شغال والمراوح تدور، بس الشاشة سوداء». وفي أغلب المرات يطلع السبب شي بسيط ينحل في دقيقة، والجهاز سليم مية بالمية.

جمعنا لك هنا نفس الخطوات اللي نمشي عليها احنا لما يكلمنا أحد بهالمشكلة، وبنفس الترتيب. ابدأ من أولها، وغالبًا ما بتحتاج توصل للنص الثاني من المقال.

باختصار: تأكد إن كيبل الشاشة في كرت الشاشة مو في اللوحة الأم، وإن الشاشة على المدخل الصحيح، وفي أول تشغيل انتظر دقيقتين. هذي الثلاث تحل أغلب الحالات.

خلنا نبدأ من الأسهل

الكيبل في المكان الغلط

هذا السبب رقم واحد عندنا، وبفارق كبير. خلف الجهاز فيه منافذ شاشة في مكانين: فوق في اللوحة الأم، وتحت في كرت الشاشة. ولما يكون جهازك فيه كرت شاشة، المنافذ اللي فوق ما تطلع صورة أصلًا.

الحل: طلّع الكيبل ووصله في المنافذ الأفقية اللي تحت، اللي في كرت الشاشة.

الشاشة على مدخل ثاني

بعض الشاشات ما تنتقل لحالها للمدخل اللي فيه إشارة. دوّر على زر Input أو Source، غالبًا يكون تحت الشاشة أو خلفها، واختر المدخل اللي موصل فيه الكيبل.

أول تشغيل ياخذ وقته

أول ما تشغل الجهاز بعد الاستلام، يضبط إعدادات الرام، وهذي العملية ممكن تاخذ لين دقيقتين والشاشة سوداء والمراوح شغالة. هذا طبيعي ومتوقع.

الغلط اللي يصير كثير إن الواحد يطفي ويشغل كذا مرة، وكل مرة يرجع الجهاز يبدأ من الصفر. شغّله واتركه دقيقتين كاملة.

جرب كيبل أو منفذ ثاني

كرت الشاشة فيه أكثر من منفذ، جرب واحد ثاني. وإذا عندك كيبل ثاني أو شاشة ثانية، حتى التلفزيون، جربها. كذا تعرف المشكلة من الجهاز ولا من الشاشة والكيبل.

والفرق بين المنفذين سهل: منفذ DisplayPort واحد من أطرافه مقصوص بزاوية، وHDMI الطرفين فيه نفس الشكل.

ما انحلت؟ نشوف من داخل الجهاز

لمبات اللوحة الأم

أغلب اللوحات الأم فيها أربع لمبات صغيرة جنب بعض، مكتوب جنبها CPU وDRAM وVGA وBOOT. لما يوقف الجهاز عند مشكلة، تبقى وحدة منها منورة وتقول لك وين المشكلة بالضبط.

صوّر اللمبة المنورة وخلها عندك، تختصر علينا وعليك وقت كثير لو احتجت تكلمنا.

قبل ما تفتح الغطاء: طفّ الجهاز من الزر اللي خلف مزود الطاقة، وافصل كيبل الكهرباء.

كيبل الطاقة حق كرت الشاشة

مع الشحن والهز ممكن يتحرك كيبل الطاقة اللي داخل في كرت الشاشة شوي. اضغطه لين يدخل للآخر. في الكروت الحديثة لازم تسمع «طقّة»، وما يبقى أي فراغ بين الكيبل والمنفذ.

الرامات

هذي الخطوة بس إذا كانت لمبة DRAM هي المنورة. افتح القفل اللي على طرف الرام، طلّعها ورجعها بنفس مكانها، واضغط من الطرفين لين يطق القفل.

متى تكلمنا على طول

إذا الجهاز ما فيه ولا إضاءة والمراوح ما تدور، أو طلعت ريحة احتراق أو صوت غريب، افصله من الكهرباء وكلمنا مباشرة بدون ما تجرب شي. ونفس الشي إذا مشيت على كل الخطوات وباقية لمبة منورة.

أرسل لنا على واتساب صورة اللمبة المنورة ورقم طلبك، ونتابع معك.